TATAU, 3 April: Dua projek neriki jalai ari Muput ke Ulu Penyarai, enggau jalai ari Nanga Jenga/Anap/Ulu Takan nguna standard R3, Opis Kereja Raya (JKR) patut dikemujur sereta dirumban.
Menteri ba Opis Premier Sarawak, Dato Sri John Sikie Tayai madahka, projek neriki kedua-dua jalai nya beguna amat dikena ngemudahka pemindah sereta pengawa ninting hari perayat ba endur nya jemah.
“Bekaul enggau jalai ari Muput ke Ulu Penyarai, keretas kereja deka dianjung kami ngagai Autoriti Pemansang Bintulu (BDA) ngambi bejalaika pengawa ke patut.
“Kami ngarapka pengawa neriki jalai tu ulih dirumban,” ku iya madah.
John Sikie ke mega Kaban Kunsil Nengeri (ADUN) Kakus nerangka, jalai ari Nanga Jenga/Anap/Ulu Takan udah dikerandau sida begulai enggau RECODA ti ngesan tangkup pengawa nyeruri jalai nya.
“Pia mega, jalai ke simpang masuk rumah panjai ba endur ke besemak dia mega diteriki,” terang iya.
Iya mansutka jaku nya rambau bejaku ba Rh Micheal Kuang, Ulu Penyarai beserimbai enggau Program Nemuai Dikena Nentuka Alignment Jalai Ngaul Projek Neriki Jalai Muput ke Ulu Penyarai Tatau Hari Dua tu tadi.
Sida bukai ke bisi ngulu program nya staf ari Opis Pelilih Tatau, Sebauh enggau Bintulu, Opis Residen Bintulu, BDA, Opis Kereja Raya (JKR), Opis Parit enggau Entali Ai (DID), Opis Tanah enggau Survei (JTS), Polis Diraja Malaysia (PDRM) sereta Tuai Komuniti enggau Tuai Raban Bansa (KMKK).
