BETONG, 1 April: Pintu Besai Aidilfitri ukai semina betuju mandangka pengerichah pengerami Hari Raya Aidilfitri aja.
Tang mega nyadi lambang ngemegahka komuniti Melayu ke diau di menua pesisir kenyau ari kelia.
Ba penemu Tuai Kampung Tengah Betong Haji Abang Abdul Manaf Haji Abang Zaini, iya berasai chukup temegah enggau gaga ati lebuh meda mensia mayuh ulih ngidupka aktiviti ngias pintu besai nyerumba Hari Raya Aidilfitri ti deka diintu enda lama agi.
“Nyadi nya lambang ngemegahka kitai bansa Melayu ba menua pesisir kenyau ari kelia.
“Enti ulih kitai deka ngaga iya nbiniting taun laban tu lambang pengerichah pengerami Hari Raya Aidilfitri.
“Enti nadai pintu besai amat sunyi mih genturung pendiau, nyadi patut bisi pintu besai tu,” ku iya.
Abdul Manaf manah munyi nya pengudah ngemataka pengawa beripai ngias Pintu Besai Aidilfitri di Kampung Tengah Betong, kemari.
Ku terang iya, pemeri ari raban bekaul enggau gerempung ukai perintah (NGO) ba pelilih Betong chukup dikearap dudi hari.
Bantu nya chukup beguna ngambika sida ulih ngatur Pekit Ngias Pintu Besai Aidilfitri ninting taun ngambika Pengerami Hari Raya ba Kampung Tengah Betong lebih richah, ku iya. -TVS
