SARATOK, 29 Mac: Tuai ba renggat baruh lebih agi bala Tuai Rumah enggau Tuai Raban Bansa (KMKK) dipinta terus bekerejasama enggau tuai opis-opis perintah dikena nentuka pemansang infrastruktur, utiliti, sosio ekonomi enggau ngemansangka kualiti pengidup rayat.
Tuai Pelilih Saratok Muhammad Dino Amid madah, beduduk ari nya timbal ari rayat renggat baruh chukup beguna dikena nentukka sesebengkah pemutus lebih agi bekaul enggau pengawa ngatur tasah.
“Tuai Rumah enggau Tuai Raban Bansa ke udah (dichiri) patut ngerembaika polisi-polisi perintah begulai enggau tuai opis perintah.
“Pekara ke dikedeka opis perintah diatu iya nya ngulihka timbal ari sida (KMKK) ngambika ulih diguna kami opis perintah nyengkaum raban kaunsilor di Saratok.
“Aram kitai bela berunding baka ni deka ngemansangka agi pelilih Saratok ari sukut infrastruktur, utiliti, sosio ekonomi enggau ngangkatka kualiti pengidup rayat,” ku iya.
Dino mansutka jaku nya pengudah tembu Pengawa Nyadung Bubur Lambuk begulai enggau Tuai Opis Perintah sereta Tuai Rumah enggau Tuai Raban Bansa Pelilih Saratok di Diwan Mayuh Guna Opis Pelilih Saratok, empai lama.
Sama bisi datai Pegawai Penguasa Pelilih Mit Nanga Budu Hatta Adenan, Sapit Pegawai Pelilih Saratok Laga Kueh, Tuai Polis Pelilih Indu Opis Polis Pelilih Saratok DSP Mordani Tanin, bala tuai raban bansa enggau ke bukai.-TVS
