DEBAK, 29 Mac: Raban Nyelai Pendiau (OKU) lebih agi di bagi menua Betong diperansang ngerebut peluang dalam bidang lumba ke udah disediaka Opis Menteri Pemansang Indu, Anak Mit enggau Pengelantang Komuniti (KPWKK).
Sapit Menteri KPWKK Sarawak Datuk Mohd Razi Sitam madah, bakat ke dikembuan raban OKU diatu chukup digiga Sarawak.
“Dibaruh opis kitai (KPWKK) mega benung ngelatih sereta ngiga raban OKU ke bisi bakat dalam bidang lumba lalu sida dikangau atlit Para.
“Nya alai, anang takut nyema kitai bisi anak OKU tau padah ngagai Opis Pengintu Pengelantang Pendiau (JKM) Bagi Menua Betong senetang bakat sida.
“Ari nya tadi bakat sida ulih dikelala lalu diansah ngambika ulih nyadi atlit Sarawak ungkup Lumba Malaysia (SUKMA) sereta mega renggat ke lebih tinggi baka Olimpik enggau ke bukai,” ku iya.
Razi ke mega Kaban Kunsil Nengeri (ADUN) Saribas madah munyi nya pengudah tembu Program Sejambak Kasih Hari Raya Aidilfitri Bagi Menua Betong 2023 diatur ba Diwan Millenea Debak, kemari.
Ku iya, bakat ke digiga nya lebih agi raban OKU ke beumur 45 taun ke baruh.
Sama bisi datai Pegawai Penguasa Pelilih Mit Debak Hafiz Kepli, Pegawa Opis Pengintu Pengelantang Pendiau Rabansa Bansa Bagi Menua Betong Abdul Samat Kassim enggau ke bukai.-TVS
