SARATOK, 26 Mac: Semua projek dibaruh Skim Peminta Tambah enggau Laun (ALAF) ti dikemendar taun 2022 di sitak Kunsil Nengeri (DUN) Kalaka diatu nyau deka tembu penuh.
ADUN Kalaka Mohd Duri madah projek ke beungkus urung RM2.9 juta nya deka meri pemaik ngagai 120 pintu rumah di sitak nya.
“Bisi 120 pintu rumah udah enggau deka dipasang meter baka di Kampung Lot Bunian urung 39 pintu nyengkaum 11 pintu rumah PPRT deka ngasaika bekal karan 24 jam.
“Udah nya di Kampung Pagan bisi 81 pintu enggau 64 pintu udah dipasang meter ditangkan ba sitak Roban urung 18 pintu pengawa nyambung bekal karan benung dipejalaika raban Sesco,” ku iya.
Mohd Duri madah munyi nya ngagai media pengudah tembu pengawa kelai masang meter ba sebuah rumah ke bisi minta Projek ALAF di Kampung Lot Bunian ditu, kemari.
Nangkan ke nya, ku Mohd Duri 80 agi peminta ungkup projek nya di DUN Kalaka diatu benung ba proses kepenudi sebedau pengawa masang meter dipejalaika.
Sama bisi ngulu penawa nya pengari Pegawai Pelilih Saratok Hajjah Dahlan, Menijar Pampang Sesco Saratok, Amran Merikan enggau ke bukai.-TVS
