SARATOK, 26 Mac: Pengani Rumah Panjai Thomas Padat di Itop Saratok ke tebunsa ketegal tanah tusur kena Hari Minggu tu tadi udah nerima bantu tumu ari Kaban Kunsil Nengeri (DUN) Krian Friday Belik.
Pegawai Palan Servis ADUN Krian Spancer Gon ngarika Friday madah, bantu wang sepenyampau RM3,000 dikena ngaga baru agu enggau bilik mandi ungkup rumah sida ke tebunsa.
“Nyadi bantu tu tu disuaka kami ari Palan Servis DUN Krian begulai enggau Penghulu bisi meri bantu tumu sepenyampau RM3,000.
“Kitai sama nemu (ensana) sida ba Rumah Thomas tu dituntung penusah tanah tusur ngujungka semua perengkaguna ke digaga sida ba belakang rumah bilik lumur lapan, semilan enggau sepuluh rusak sereta rarat ditabanka tanah tusur nyengkaum agu (bilik lumur lapan),” ku iya.
Iya madah munyi nya pengudah nyuaka bantu tumu ngagai Tuai Rumah Thomas Padat, kemari.
Udah nya, Spancer madah atur pengawa bukai deka dikerandau udah tu beduduk ari ADUN Krian diatu bisi pengawa ba endur bukai.
Ba penusah ke nyadi Hari Minggu tu tadi, pengani ba Rumah Panjai Thomas begau laban penyadi tanah tusur ke nuntung tiga pintu bilik ba rumah panjai nya.
Taja pia, nadai penusah bebadi diripotka nyadi lalu asil peresa raban Bomba enggau Penyah Penusah Saratok madahka rumah panjai nya agi ba kategori likun endur diau.-TVS