DEBAK, 25 Mac: Projek Sapat Bah berengkah ari Kampung Buda nyentuk ke Kampung Serabang di Saribas ke beungkus RM30 juta digaga nengah agih ari Ejensi Pemansang Bagi Menua Betong (BDDA) deka berengkah enda lama agi.
Sapit Menteri Indu, Anak Mit enggau Pengelantang Komuniti Sarawak Datuk Mohd Razi Sitam madah, naka diatu projek nya benung nyiri juru perunding.
“Ungkup genturung pendiau ba sepanjai sungai di sitak Saribas ke udah disetuju enggau ungkus RM30 juta sereta dikemata dibaruh BDDA.
“Asil ari sekeda aum ke udah dipejalaika enggau ejensi pengereja pengawa diatu aku udah nerima pemendar nyiri juru perunding projek nya,” ku iya.
Razi ke mega Kaban Kunsil Nengeri (ADUN) Saribas madah munyi nya pengudah bebuka pasa ba Masjid Kampung Serabang, empai lama.
Ku terang iya, projek nya endang siti ari pengawa sepanjai maya dikena napi penyadi pasang raya enggau ujan bangat nyentuk ngujungka penusah bah suah nyadi ba sekeda endur.
Antara sitak enggau genturung pendiau ke bekaul enggau projek sapat bah tu iya nya Kampung Buda, Kampung Tanjung Assam, Kampung Medang enggau Kampung Serabang.-TVS
