SARATOK, 22 Mac: Sepenyampau RM60 juta tauka satu pertiga ari bajet penuh RM200 juta sitak Kunsil Nengeri (DUN) Kalaka dibaruh Ejensi Pemansang Bagi Menua Betong (BDDA) deka dikena ngemujurka projek pemansang ngaul sektor betanam betupi.
ADUN Kalaka Mohd Duri madah pengawa nya dikena nangkup peminta Premier Sarawak Datuk Patinggi Tan Sri Abang Johari Tun Openg ngambika matak raban orang bumai regas agi ngemansangka tanah sida.
“Urung RM60 juta diagihka aku dikena ngaga jalai, jematan, ngemanah pintu ai dikena meransang raban orang bumai regas agi betanam betupi.
“Nya kebuah kitai bisi nyendiaka ‘Food Safety’ ngambika raban orang bumai teperansang bumai baru seraya dikena nyungkak penatai pemisi sida.
“Kitai deka meda rayat bela ngasaika penatai pemisi ke tinggi ari pengawa betanam betupi seriris enggau saran Premier Sarawak,” ku iya.
Mohd Duri madah munyi nya lebuh dipinta nimbal pemansang pemadu baru pasal projek betanam betupi ba sitak DUN Kalaka pengudah ngabas Taba Projek Palan Pengetu Perintah ditu, kemari.
Ku iya, naka tu bisi RM2.2 juta ungkus projek betanam betupi ke meri pangka besai dibaruh BDDA udah dipejalaika ba Jelupang enggau ba Nyiar, Roban.
Empat ejensi pengereja pengawa ke bisi ngambi bagi ba projek betanam betupi di Kalaka iya nya Opis Kereja Raya (JKR) Beting, Opis Parit enggau Entali Ai (JPS) Betong, Opis Betanam Betupi Betong enggau Kaunsil Pelilih Saratok (MDS).-TVS
