DEBAK, 22 Mac: Program bantu barang pemakai ke diberi raban Mercy Malaysia Pampang Sarawak chukup besai reti dikena ngelempungka tating belanja ke ditapi raban kurang pemisi.
Tuai Pekara Wang Komiti Pemansang enggau Pengelikun Genturung Pendiau (JKKK) Kampung Melayu Dit Harakiah Samsudin, 58 madah program bantu nya endang chukup manah lalu iya ngarika bala penerima meri terima kasih besai ngagai raban Mercy Malaysia enggau Maybank Islamic Berhad.
“Aku chukup gaga laban bisi nerima bantu tu nyadi tu ulih dikena ngelempungka tating belanja raban kurang pemisi.
“Nya alai, aku ngarapka program bantu baka tu terus dipejalaika dudi hari,” ku iya.
Iya mansutka pekara nya pengudah tembu pengawa kelai nyuaka bantu barang pemakai ari Mercy Malaysia enggau Maybanks Islamic Berhad nengah Program Regional Ramadhan Relief 2024 ditu, empai lama.
Bisi 16 raban ari Kampung Melayu Dit nerima bantu barang pemakai baka berau, minyak makai enggau barang pemakai ninting hari.
Program RRR nya dikemujur nengah kerejasama raban Islamic Relief Malaysia, Mercy Malaysia, Islamic AID Malaysia enggau Yayasan Ikhlas.-TVS
