DEBAK, 22 Mac: Mercy Malaysia Pampang Sarawak begulai enggau Maybank Islamic Berhad udah nyadung urung 320 bungkus barang pemakai di selampur nengeri tu.
Menijar Mercy Malaysia Sarawak Diana David Itang madah, palan keterubah ungkup program nya nyelinting raban Asnaf, Orang Nyelai Pendiau (OKU) enggau raban kurang pemisi ba Kampung Semarang Pusa diatur kena 2 Mac tu tadi.
“Nyadi ba Sarawak kami udah nyadung urung 320 bungkus barang pemakai enggau kena 2 Mac program tu berengkah ba Pusa di Kampung Semarang.
“Bisi lima buah genturung pendiau ba Pusa nerima bantu tu, ditangkan dua buah genturung pendiau di Kuching iya nya Kampung Gita, Matang enggau di Samariang.
“Nyadi serak tu kebendar program keempat iya nya di Kampung Dit Debak lalu program tu deka terus dipejalaika nyentuk pengujung Ramadan sebedau Aidilfitri,” ku iya.
Diana madah munyi nya pengudah tembu pengawa kelai nyuaka bantu ‘Regional Ramadhan Relief’ (RRR) ngagai 16 raban Asnaf di Kampung Melayu Dit Debak kena Hari Tiga tu tadi.
Taun tu, Maybank Islamic Berhad udah ngagihka belanja sepenyampau RM 1.7 juta lalu penyampau diselinting iya nya 6, 000 iku nengah program RRR.
Kelimpah ari Malaysia, bisi 11 agi menua ke nerima pemaik ari program ke sebaka iya nya Indonesia, Singapore, Vietnam, Filipina, Laos, Thailand enggau Kemboja.
Tu nyengkaum menua Brunei Darussalam, Dubai enggau raban Islam di Cox’s Bazar enggau Bangladesh.-TVS
