BETONG, 19 Mac: Bisi dua kompaun enggau 33 notis tangkan udah dikeluarka ngagai raban pedagang Bazar Ramadah ke puntan nitihka Atur Pengawa Standard (SOP) Ngenah enggau Pemeresi Pemakai ba pelilih Betong.
Pegawai Opis Pengerai Bagi Menua Betong Dr Mohamad Norhaizan Ahmad Narawil madah, raban sida enda ulih enda mansutka kompaun enggau notis tangkan nya pengudah beratika pedagang ke bekaul puntan nitihka SOP ke udah ditetapka.
“Dua kompaun enda ulih enda dikeluarka ungkup pengelikun pemakai.
“Udah nya bisi 33 agi diberi tangkan dikena nentuka pengeliku enggau pemeresi pemakai seruran dikemerat,” ku iya.
Dr Mohamad madah munyi nya nyerumba pengawa Bejadika Bazar Ramadan Betong di Tasik Medan empai lama.
Berebak enggau nya, Dr Mohamad madah, tiap kali Ramada baka nya mih suah nyadi orang mabuk pemakai nyadi sida (opis pengerai) enggai meda pekara ke baka nya nyadi baru.
Ku iya, bisi 153 ruai premis Bazar Ramadan udah diperesa kenyau iya dibuka berengkah 12 March tu tadi.
Dr Mohamad madah dikena nentuka pekara nya nadai pulaika penyarut dia raban sida udah nempa kerejasama enggau raban bekaul kelimpah deka terus bejalaika pengawa matau nyentuk ke pengujung Ramadan.-TVS
