BETONG, 19 Mac: Kaban Parlimen Betong Dr Richard Rapu nyukung perambu senentang pengari rayat semina diberi siti aja pinchin ungkup sekeda pengawa ke kala dipangku sida sekumbangka bejalaika servis.
Dr Richard madah diri chukup andal raban perintah udah bisi siti mekanisme pemadu manah dikena mutarka pekara nya nyema skim pinchin nya diketu ke pemaik semua raban.
“Aku nyukung nyema siku kaban politik semina diberi siti pinchin ungkup pangku ke pemadu besai kala dipegai iya.
“Nyadi aku mega andal perimtah tentu udah ngaga aum begulai enggau opis tauka ejensi bekaul dalam nentuka gaji pinchin enggau ke bukai,” ku iya.
Dr Richard madah munyi nya lebuh meri timbal pasal perambu ari Presiden Cuepacs Datuk Dr Adnan Mat ke minta ngasuh kaban politik tauka pengari rayat diberi siti aja pinchin ungkup pangku pengawa ke mayuh dipegai sekumbang bejalaika servis pengudah bejadika Bazar Ramadan Betong 2024 empai lama.
Nangkan ke nya, Dr Richard madah nyema pekara nya dikemujur jemah iya andal perintah tentu udah bisi mekanisme ke baru.
Sebedau tu isu pinchin raban pengarai rayat dibantaika Presiden Cuepacs Datuk Dr Adnan Mat maya bejaku ba sebengkah program di Kota Samarahan apin lama ke udah.
Ku iya, nya endang atur ke pemadu manah dikena ngelimat belanja perintah dudi hari.-TVS
