SARATOK, 17 Mac: Pengawa ngemaruka rintai kaban Parti Demokratik Progresif (PDP) Pampang Krian nyadi siti ari agenda besai dikerandau maya aum pampang parti nya Hari Enam tu tadi.
Chairman PDP Pampang Krian Friday Belik madah, tuju pengawa nya dikena ngelangkar strategi baru dikena nambahka penyampau kaban parti di Krian lebih meruan dudi hari.
“Kitai udah ngatur sekeda pengawa dalam beratika baru rintai kaban laban bisi sekeda nya udah midang.
“Udah nya, sekeda nadai agi (ngundi) ba Krian enggau ke bukai,” ku iya.
Friday ke mega Kaban Kunsil Negeri (ADUN) Krian madah munyi nya pengudah tembu aum keterubah PDP Pampang Krian pagi tadi.
Nangkan ke nya, Friday madah sida deka nentuka penyampau ke betul kaban PDP Krian ngambika muntang agi ngatur strategi deka nambahka penyampau kaban baru.
Ku iya, bepelasarka penyampau besai ari Indu Opis PDP di Kuching, PDP Krian diatu ngembuan urung 4,000 kaban ke berejister.
Kelimpah ari agenda nya, aum nya mega bisi berandau pasal projek-projek pemadu baru ari perintah Sarawak di sitak DUN Krian.
Sama bisi datai Sekretari PDP Krian Dom Silang, Sapit Chairman PDP Krian Langan Limping enggau bala komiti ke bukai.-TVS
