BETONG, 15 Mac: ‘Program Impact Ramadan’ diatur Kelab Beliawanis Betong begulai enggau Raban Nembiak Layar nerima timbal ke chukup manah ari bala pedagang enggau mensia mayuh ke diau besemak.
Chairman Kelab Beliawanis Betong Clement Lasu Jhon Jingan madah, kenyau dipenyadi ari pun Ramadan nyentuk Hari Ketiga Ramadah sida udah mujur ngempuruka urung 20 kilogram pemakai enggau ai irup pemeri ari mensia mayuh ngambika disadung ngagai masjid, surau enggau raban kurang pemisi ba Betong.
“Program tu diatur pengelama seminggu berengkah hari keterubah bepasa (12 March) nyentuk 17 March tu.
“Nyadi kitai nyaran deka mantu raban masjid, surau enggau sida ke gawa ba luan sereta raban kurang pemisi ngambika sama ngasaika pemaik ba bulan Ramadan,” ku iya.
Clement mansutka penemu nya maya dirandau TVS ba Palan Ngempuru Pemakai enggau Ai Irup Program Impact ba Bazar Ramadan Betong ditu kemari.
Mensia mayuh ke deka meri pemakai enggau ai irup ulih nganjung terus ngagai palan ke udah disediaka Raban Beliawanis Betong .
Palan ngempuru pemakai tu iya nya ba mua pintu besai tama ngagai Bazar Ramadan Betong beregkah pukul 4.30 lemai nyentuk 6.30 lemai.-TVS
