BETONG, 14 Mac: Urung 5,000 iku temuai ari dalam enggau luar Betong dipelaba deka datai ngerichahka Pengerami Gawai Dayak Renggat Betong ti deka diatur kena 18 Mei 2024.
Penyanding Penemu Kaban Komiti Besai Pengerami Gawai Dayak Renggat Betong 2024, Dato Gerald Rentap Jabu madah iya chukup andal penyampau nya ulih dijapai bepelasarka sukung tegap ari bala pengari rayat di bagi menua Betong.
“Kitai deka berengkah enggau Bazar Gawai nyentuk ke hari pengerami kepenudi iya nya kena 18 haribulan.
“Udah nya, kitai dela ngatur Malam Mantar Gawai Renggat Betong kelimpah ari nya mayuh aktiviti bukai deka diatur sepanjai bulan Mei enggau June.
“Dalam bulan June ila bisi Sarawak Tourism Federion House di Rumah Panjai Anyi Matop Paku lalu penyampau temuai disadang ngulu pengerami tu urung 2, 000 iku,” ku iya.
Rentap ke mega Kaban Kunsil Nengeri (ADUN) Layar madah munyi nya pengudah ngulu Aum Komiti Besai Pengerami Gawai Dayak Renggat Betong, empai lama.
Nangkan ke nya, Rentap madah kena 8 June mua ke pagi deka diatur Program Bejalai Bebala Mayuh Gawai di Stadium Betong ngelinggi Pasar Betong lalu program tu dikearapka dipasuk 3, 000 iku penyereta.
Ku iya, serak tu Opis Tanah enggau Survei (JTS) Betong udah diberi tanggungpengawa nyadi pengatur besai pengerami nya.-TVS
