SARATOK, 14 Mac: Kompleks Lumba Saratok deka digaga baru sereta disikap enggau perengkaguna ke lebih menyana.
Kaban Kunsil Nengeri (ADUN) Krian Friday Belik madah pengawa ngemanah Kompleks Lumba Saratok nya deka berengkah enda lama agi.
Ku iya diatu raban Opis Kereja Raya (JKR) benung nyendiaka tempa tukuh sereta dokumen ke bekaul sebedau nyiri juru perunding.
“Perengkaguna ba Komplek Lumba Saratok tu ila deka ditambah agi.
“Kitai ngarapka pengawa ngemanah Komplek Lumba Saratok tu ulih dipejalailka enggau lengkas lalu pemadu laun pan ujung taun 2024,” ku iya.
Friday madah munyi nya pengudah Taklimat begulai enggau ejensi ke belaul enggau Kompleks Lumba Saratok sehari tu tadi.
Ku iya, sepenyampau RM15 juta udah diagih asil pemeri ari Ejensi Pemansang Bagi Menua Betong (BDDA) dikena ngemujurka projek nya.
Agih belanja nya ila deka dikena ngamanah panggau besai, penuduk beperabung, agu mensia mayuh enggau bilik pengenduh ungkup raban pemesai.
Pengawa ngemanah projek nya mega ngaul pengawa ngaga baru trek endur bebasikal, palan sembiang enggau pelaman besai ungkup sida ke bisi ati belajar main golf.-TVS
