SARATOK, 13 Mac: Bisi 84 iku Tuai Raban Bansa enggau Tuai Rumah (KMKK) ari sitak Budu, Kabo, Awik, Sebetan enggau Krian Tengah bela udah nerima surat chiri mangku pengawa nyadi ketuai.
ADUN Krian Friday Belik madah jeman kemaya hari tu KMKK mesti nyikap diri enggau kereban teknologi pemadah.
Ku iya, tu dikena nentuka nembiak redak ke dijaga sida bulih penerang ke betul pasal semua aktiviti tauka program ke bisi diatur ejensi perintah.
“Kitai endang nyadika teladan orang kitai ngiring nembiak dipegai kitai endang sigi mesti ngembuan penemu ke lebih agi ari orang dipegai kitai lebih agi ba rumah panjai.
“Pengawa nyadi Tuai Rumah ba jeman diatu, kitai ukai semina Tuai Rumah, bala ke gawa perintah tauka bala pengari rayat bela begunaka penerang ke betul,” ku iya.
Friday mansutka penemu nya maya bejaku ba Pengawa Nyerahka Setipikit ngagai Tuai Raban Bansa enggau Tuai Rumah (KMKK) ba Diwan Mayuh Guna Opis Pelilih Saratok.
Renggat serak tu ngemataka 78 iku ketuai nyengkauk KMKK ari sitak Budu, Kabo, Awik, Sebetan enggau Krian Tengah udah disambung servis.
Sida ke baru dipadu mangku pengawa nyadi ketuai renggat baruh iya nya enam iku.
Sama bisi datai Senator Pele Peter Tinggom, Residen Betong Richard Michael Abunawas enggau Pemangku Pegawai Daerah Saratok Laga Kueh.-TVS
