SARATOK, 13 Mac: Tuai Raban Bansa enggau Tuai Rumah (KMKK) ke udah dichiri mesti ngadang sepanjai maya bekaul enggau pangku pengawa ke disan diri.
Residen Betong Richard Michael Abu Nawas madah, endang pekara ke dikeandal perintah deka meda bala KMKK ke udah dichiri ulih ngereja pengawa enggau manah nyengkaum ngerembaika polisi-polisi ke dipejalaika perintah ngagai rayat renggat baruh.
“Kita udah dichiri perintah nyadi ketuai nyadi kita mih dikearap ngerembaika polisi perintah ngagai nembiak redak ba rumah panjai diri.
“Arapka rayat ke dijaga kita bela bulih penerang ke beguna, nyema sida apas meretika pasal sesebengkah berita (polisi-polisi perintah) nyadi kita patut mantu nerang ngagai sida,” ku iya.
Richard madah mynyi nya rambau Pengawa Nyerahka Surat Chiri ngagai bala KMKK di Saratok empai lama.
Pengawa nya dikemujurka ADUN Krian Friday Belik sereta bisi digulu Senator Pele Peter Tinggom, Pemangku Pegawa Pelilih Saratok Laga Kueh enggau ke bukai.-TVS
