SPAOH, 11 Mac: Raban pengajar ari sekula primari lebih agi ba sitak Bukit Saban ke agi bisi nembiak bepenanggul 3M iya nya macha, ngira enggau nulis dipinta nitihka chara ke dikena raban pengajar ba Sekula Primari (SK) Nanga Gayau mutarka penanggul nya.
Sapit Premier Sarawak Datuk Amar Douglas Uggah Embas madah tu nyata dipeda asil chara ke diguna bala pengajar ba sekula nya dia bala nembiak ke enda nemu macha, nulis enggau ngira diatu semua udah pandai.
“Kami bisi nerima timbal ari sekeda sida taja udah apus primari enam tang agi bisi enda nemu nulis, macha enggau ngira.
“Nyadi aku udah berandau enggau Kepala Pengajar mesti mutarka penanggul tu abis nadai dua tauka tiga taun dia pekara tu mujur teputar.
“Siti ari sekula ke udah mujur mutarka pekara tu iya nya SK Nanga Gayau,” ku iya.
Uggah nerangka pekara nya ngagai raban media pengudah tembu pengawa nyuaka bantu pra sekula ngagai 940 nembiak ari tujuh buah sekula ba DUN Bukit Saban, empai lama.
Dulu ari nya bisi 1,000 iti kantung sekula udah disuaka ADUN Bukit Saban ngagai bala pengari enggau apai indai nembiak ba sebengkah pengawa diatur ba Palan Sevis Pengari Rayat DUN Bukit Saban.
Sama bisi ngulu pengawa Kaban Parlimen Betong Dr Richard Rapu enggau ke bukai.-TVS
