SPAOH, 11 Mac: Pengeransing enggau tangkup pengawa orang indu dalam mantu nyungkak pemansang di Malaysia lebih agi Sarawak patut dibasa sereta dikenang.
Sapit Premier Sarawak, Datuk Amar Douglas Uggah Embas madahka, orang indu ngesan tanggungpengawa besai dalam ngelanggur, ngatur enggau nentuka tetiap program bejalai enggau lanchar.
”Kitai meri terima kasih ngagai orang indu ti nyaga ruang bilik diri ngambika kitai ditu sama mansang maju laban orang indu ngembuan tangkup pengawa ke chukup besai ukai semina di Bukit Saban tang serata menua.
“Nya kebuah rambai jaku kitai iya nya ‘Wanita Dijulang Negara Terbilang’,” ku iya.
Uggah mansutka jaku nya rambau ngintu Hari Orang Indu Renggat Bukit Saban 2024, empai lama.
Entara program bisi diatur ba pengerami tu iya nya Licha Chara Nyidi Tumu Riman Tusu, Licha Anti Scam enggau Pekit Nyumai digulu semua 18 ranting Indu Parti Pesaka Bumiputera Bersatu (PBB) Pampang Bukit Saban.
Berebak enggau nya, Uggah madahka raban indu lebih agi di Bukit Saban mega nyadi tulang belakang perintah Gabungan Parti Sarawak (GPS) maya pengawa bepilih.
Nya alai, iya muji komitmen enggau penaluk sida dalam nyukung pengawa perintah.
Ku Uggah, komitmen enggau penaluk nya nyata lebuh sida sanggup enggau pengawa parti dalam nentuka pengundi di Bukit Saban terus meri sukung ngagai chalun GPS ba tetiap pengawa bepilih ke diatur ngelama tu.
“Bala indu kitai nyerumba pengawa ngerami Hari Orang Indu Bukit Saban tu mih peluang aku enggau YB Richard Rapu meri terima kasih ngagai sukung kuat ari raban indu kitai di Bukit Saban ditu laban orang indu iya nya penyukung kuat GPS di sitak kitai di Bukit Saban.
“Sida udah bebendar ngangkatka parti kitai ba sitak tu enggau nengeri Sarawak,” ku tandu iya.
Ba awak ke sama, iya ngarap raban indu terus bejalaika tanggung pengawa sida enggau meri komitmen meransang pemujur akademik nembiak di menua pesisir.-TVS
