SPAOH, 11 Mac: Raban Opis Kereja Raya (JKR) bagi menua Betong diasuh lengkas bejalaika pengawa ngemanah jalai ari Saka, Betong ke Spaoh enggau Sekula Primari (SK) Paku Central.
Sapit Premier Sarawak Datuk Amar Douglas Uggah madah, tu dikena nentuka jalai nya seruran manah enggau nyamin pengelikun penguna serata nganti pengawa ngemanah jalai nya tembu penuh.
“Kebendar jalai ari Betong ke Spaoh rembus ke Paku Central endang enda manah lalu aku udah ngasuh raban JKR ngemanah jalai nya lengkas.
“Taja pia pengawa ngaduka jalai nya mar mimit laban bisi projek ngaga STOLPort semak nya nyadi mayuh lori berat nengah nya ninting hari.
“Nya alai, aku udah ngasuh raban Pegawai Injinir Bagi Menua Betong patut nentuka jalai nya seruran dikemanah,” ku iya.
Uggah ke mega Kaban Kunsil Nengeri (ADUN) Bukit Saban madah munyi nya pengudah nyuaka bantu pra sekula ngagai 940 nembiak ari tujuh buah sekula ba DUN Bukit Saban, ensana.
Berebak enggau nya, ku iya agih sepenyampau RM110 juta udah dikemendarka Premier Sarawak dikena ngemanah jalai nya nyengkaum dikena ngaga sebuah jematan sebedau tu.
Pengawa ngemanah jalai nya diatu benung dipejalaika raban kunteriktor dibaruh kemata Kaunsil Tanah Sarawak (SLDB).
Pengawa nya dipelaban tembu enda lama agi tauka sebedau Projek Padang Bilun Menasan Pandak (STolPort) Bebuling tembu.-TVS
