SARATOK, 8 Mac: Pengawa nyiri ex-Sekretari Kunsil Nengeri (DUN) Sarawak, Pele Peter Tinggom nyadi Senator dikearap deka meri mayuh agi pemaik ngagai rayat di Saratok.
Kaban Kunsil Nengeri (ADUN) Krian Friday Belik madah, ari sukut bukai pengawa nyiri Pele diperati ulih ngerapitka agi kaul rayat enggau semua pengari rayat ari Gabungan Parti Sarawak (GPS) ba Parlimen Saratok.
“Pengawa nyiri Pele endang ngarika PDP sereta Gabungan Parti Sarawak.
“Nya alai, asai aku iya (Pele) ulih ngerapatka kaul rayat di tiga DUN iya nya DUN Kalaka, Krian enggau Kabong tauka ba Parlimen P. 205 Saratok.
“Kebuah pia laban iya ukai semina gawaka siti DUN tang mungkur tiga DUN di Saratok ditu,” ku iya.
Iya madah munyi nya pengudah Aum Komiti Sektor Pemansang Utiliti enggau Telekomunikasyen Ejensi Pemasang Bagi Menua Betong (BDDA) keterubah ungkup taun 2024 ba Bilik Aum Kaunsil pemansang enggau Pengintu Tanah (LCDA), kemari.
Ku tandu Friday, iya chukup temegah enggau pengawa nyiri Pele nyadi Senator lalu sedia bekerejasama ngambika pemansang di Saratok terus bejalai.
Sebedau tu, Pele Peter Tinggom, 53 iya nya anak asal Saratok mujur angkat sumpah nyadi Senator ba mua Speaker Dewan Negara Senator Datuk Mutang Tagal di Parlimen.
Pengawa nyiri anak ex-Kaban Parlimen Saratok ke mega ex- Sapit Menteri Penyerakup Menua enggau Pemansang Raban Bansa nya disetuju Yang di-Pertuan Agong sereta diteritka berengkah 4 March 2027.-TVS
