SARATOK, 8 Mac: Lima buah projek dibaruh Komiti Sektor Pemansang Utiliti enggau Telekomunikasyen Ejensi Pemansang Bagi Menua Betong (BDDA) deka ditinda kena suku kedua taun tu.
Chairman Mohd Duri madah, semua projek nya bekaul enggau pengawa masang lampu solar di jalai besai enggau jalai nuju genturung pendiau.
“Bisi lima projek solar deka ditinda ba suku kedua, lalu kebukai nya benung ba proses tempa tukuh.
“Kitai ngarapka ari pemisi kerejasama nya semua ADUN sama bejalaika tanggungpengawa begulai enggau semua ejensi pengereja pengawa,” ku iya.
Mohd Duri ke mega Kaban Kunsil Nengeri (ADUN) Kalaka maya munyi nya pengudah betuaika Aum Komiti Sektor Pemansang Utiliti enggau Telekomunikasyen Ejensi Pemansang Bagi Menua Betong (BDDA) ba Bilik Aum Kaunsil Pemansang enggau Pengintu Tanah (LCDA), kemari.
Ku iya, kebendar semua projek bisi lapan buah dibaruh kemata Komiti Sektor Utiliti enggau Telekomunikasyen Ejensi Pemansang Bagi Menua Betong (BDDA) beungkus RM29.8 juta.
Sama bisi datai ngulu aum nya ADUN Krian, Friday Belik, ADUN Beting Maro Razaili Gapor, ADUN Lingga, Dayang Noorazah Awang Sohor enggau bala pengari ejensi perintah ke bekaul.-TVS
