BETONG, 6 Mac: Penyikap nengeri Sarawak ungkup atlit lumba angkat berat Lumba Malaysia (SUKMA) 2024 ke deka diatur di Betong diatu udah nyapai 80 peratus.
Sapit Menteri Nembiak, Lumba enggau Pemansang Dagang Sarawak Dato Gerald Rentap Jabu madah ba pun bulan Januari tu tadi raban Gerempung Angkat Berat udah datai Betong lalu beratika palan pekit nya.
“Kitai udah nerima ripot ari sida lalu naka diatu penyikap SUKMA, palan endur diau enggauke bukai tauka dikumbai ba tikas tembu 80 peratus,” ku iya.
Rentap ke mega Kaban Kunsil Nengeri (ADUN) Layar madah munyi nya lebuh nyaut pasal tanya penyikap pelilih Betong nyadi palan endur ngatur main angkat berat SUKMA 2024.
Ku iya, semua atur bekaul enggau pekara diguna sereta pengawa ngemanah palan nya ungkup main angkat berat deka diatur penuh Opis Residen enggau Opis Kereja Raya (JKR) bagi menua Betong.
Bisi 200 iku atlit enggau pegawai main angkat berat deka bemalam ba Maktab Rendah Sains Mara (MRSM) Betong sepanjai pekit nya ila.-TVS
