BETONG, 6 Mac: Mensia mayuh lebih agi bala Tuai Raban Bansa enggau Tuai Komuniti (KMKK) di nengeri tu dilalau terus ngaga ripot lengkas ngagai raban bekaul nyema bisi sebarang isu tauka ulah ke ngelanggar undang-undang ke bisi nyadi ba menua diri.
Sapit Menteri ba Opis Premier Sarawak (Intergriti enggau Ombudsman) Dato Murshid Diraja Dr. Juanda Jaya perintah seruran ngemeranka polisi tebuka enggau nerima sebarang penerang tauka kompelin ti dikenatai ke pemaik semua seriris enggau arus pemansang jeman diatu.
“Aku minta ngagai semua tuai renggat baruh nyema bisi isu salah nguna dadah, pil mabuk, ganja, judi online kini terus ripot,” ku iya.
Dr Juanda ke mega Kaban Kunsil Nengeri (ADUN) Jemoreng madah munyi nya maya bejaku ba Pengerami Bejadika Pejalai Integriti ke-10 diatur ba Diwan Layar Opis Pelilih Betong, kemari.
Ku iya, rayat mega patut ngubah chara berunding seriris enggau arus jeman moden ke nyadi ejen pemadu manah ngagai pemansang nengah ubah ke dibai perintah.
Tu dikena nentuka nengeri Sarawak terus mansang, ku tandu iya.
Program nya keterubah iya diatur Unit Integriti enggau Ombudsman (Union) begulai enggau Opis Residen Bagi Menua Betong enggau Opis Pelilih Betong ba taun tu.
Sama bisi datai Sapit Menteri Nembiak, Lumba enggau Pemansang Dagang Sarawak Dato Gerald Rentap Jabu enggau ke bukai.-TVS
