BETONG, 6 Mac: Ripot ke nyengala bekaul enggau ombudsman di Sarawak naka tu diperati enda datai 20 peratus.
Sapit Menteri ba Opis Premier Sarawak (Intergriti enggau Ombudsman) Dato Murshid Diraja Dr. Juanda Jaya madah, penyampau nya diperati tinggi taja pan ordinan bekaul enggau ombudsman naka tu bedau diteritka perintah.
“Naka sehari tu kitai (perintah) bedau neritka ordinan bekaul nyadi penyampau ripot ke mit-mit nya endang mayuh tang aku madah iya ke amat nya lebih kurang baruh 20 peratus aja.
“Tang penyampau nya kebendar tinggi laban mayuh menua ti mekuhka ombudsman ke amat tebal agi ngerikodka penyampau semina 10 peratus aja,” ku iya.
Iya madah munyi nya maya dirandau media pengudah Program Bejadika Pejalai Integriti ba Diwan Layar Opis Pelilih Betong, kemari.
Ku iya, raban perintah mega seruran ngelaluka sebarang ripot ari mensia mayuh di nengeri tu.
Dr Juanda nerang pekara tu chukup beguna dikena ngangkatka sistem pemadah perintah ulih dititih enggau bejalai lanchar seriris enggay juluk nempa Sarawak nyadi nengeri maju manggai taun 2030.-TVS
