BETONG, 6 Mac; Sapit Menteri Nembiak, Lumba enggau Pemansang Dagang Sarawak, Dato Gerald Rentap Jabu madah naka tu bedau bisi sebarang ripot diterima opis menteri nya bekaul enggau kes Sapok Biki.
Ku iya, Opis Menteri deka nguji bejalaika atur ke pemadu manah dikena mantu nyema amat ex-jaguh tinju ke kala menang midul emas ba Lumba Komanwel nya bankrap.
“Kebendar aku bedau nerima ripot penuh pasal pekara ke nya aku ngasai nya tebantai ba media rama aja.
“Aku mega bedau nanya sereta Sapok empu bedau bisi minta bantu enggau ke bukai.
“Kitai tetap deka nguji nulung enti amat pekara tu bisi nyadi sebaka enggau orang bukai ke sebedau tu kitai (perintah) tetap mantu.
“Nyadi kitai empai nemu nama pekara ke amat nyadi, nyadi aku enda ulih bejaku mayuh,” ku iya.
Rentap mansutka pekara nya lebuh dipinta meri timbal bekaul enggau isu Sapok Biki ke diaku bankrap baka ke bisi ayan ba sebengkah surat kabar menua tu apin lama ke udah pengudah ke bejadika Pejalai Integriti ba Diwan Layar Opis Pelilih Betong, kemari.
Ke penemu, Sapok asal ari Simunjan siku pinchin Soldadu Darat Malaysia (ATM) bepangkat Mejar dibaruh Rejimen Artileri Diraja (RAD).
Iya siku ari Kaban Gerempung Tinju Nengeri Sarawak (SABA) ke chukup chakah ngelatih bakat-bakat biak di nengeri tu landik ba main tinju sereta bisi numbuhka Palan Pemansang Tinju Sapok Biki kenyau ari taun 2021 ba rumah iya empu di Uni Garden, Kota Samarahan.-TVS
