SARATOK, 5 Mac: Raban pedaja ti deka ngambi bagi bejual ba ruai Bazar Ramadhan ditu dilalau ngambika seruran nyaga pemeresi, kualiti enggau enda kelalu niki ke rega pemakai ke dijual taja kos barang mata ke diatu tinggi.
Kaban Kunsil Nengeri (ADUN) Kalaka, Mohd Duri madahka, raban pedaja mesti landik nguna kreativiti sida dikena nentuka rega pemakai ke dijual enda nating orang ke meli.
“Kitai ngarap semua pedaja seruran ngemerat tikas pemeresi.
“Kedua, nyaga kualiti pemakai ngambika seruran manah sereta rega ke ditetapka naka rega kitai bejual maya pagi hari.
“Laban orang ke bepasa pan ngarapka pemakai ke dijual seruran beresi enggau ngasaika penyamai pemakai tang enda ibuh niki ke rega barang.
“Kitai nemu rega barang mata niki lalu kreativiti pedaja ulih nyual barang enggau rega ke patut,”ku iya.
Iya madah munyi munyi nya lebuh dirandau media ba Palan Servis ADUN Kalaka empai lama.
Bisi 133 ruai Bazar Ramadhan ke dibuka berengkah hari keterubah bepasa enggau dipatau Kaunsil Pelilih Saratok (MDS).-TVS
