SARATOK, 5 Mac: Raban Opis Kaunsil Pelilih Saratok (MDS) ditangkan patut seruran ngambi perati ngagai sebarang sebana tauka penanggul ke bisi nekul ba kandang endur ke dijaga sida.
Kaban Kunsil Nengeri (ADUN) Kalaka Mohd Duri madah tu betuju dikena nentuka genap penanggul nya ulih diputar enggau manah.
“Apin lama bisi dikerembai ba media rama bekaul enggau tebing sungai ke kamah.
“Aku ngasaika raban opis kaunsil mesti nemu enggau ngambi perati senetang pekara tu.
“Nya alai, aku minta raban kaunselor patut duduk betungga baum enggau bala Tuai Raban Bansa enggau Tuai Rumah (KMKK) bekaul enggau perambu pemansang ungkup menua diri.
“Enti nadai bantu (buah penemu) ari bala kaunselor tauka tuai raban bansa, MDS tentu puntan ngatur perambu ke manah,” ku iya.
Iya madah munyi nya maya bejadika program kimpin ‘Saratok Go Green Say No To Styrofoam’ enggau ‘Saratok Go Green Say To Plastic Bag’ diatur ba Diwan Mensia Mayuh Sri Krian, kemari.
Empai lama bisi ayan sebengkah penerang ke ayan ba media rama dibantaika siku penguna madah diri asa meda Tebing Sungai Krian nadai diintu manah.
Tiga batang tuju kimpin tu iya nya dikena narak pemereti ati ngagai mensia mayuh senentang chara ngatur uras kering.
Udah nya ngurangka pengawa nguna sereta muai kambut plastik ba Pasar Saratok.
Sama bisi ngulu pengawa nya Pemangku Pegawai Pelilih Saratok Sao Laga Kueh, Sekretari MDS Mccrea Joseph Pererra enggau ke bukai.-TVS
