SARATOK, 5 Mac: Kaunsil Pelilih Saratok (MDS) udah setuju netapka ninting Hari Enam nyadi hari nadai nguna kambut plastik maya bebelika barang ba Pasar Saratok.
Sekretari Kaunsil Pelilih Saratok Mccrea Joseph Perrera madahka pekara tu diputuska asil ari program randau ke diatur Kaunsil Pelilih Saratok kena 27 Disember taun nyin kemari.
“Kitai (MDS) udah ngatur program randau begulai enggau pengempu premis kena 27 Disember 2023.
“Ari sesi nya semua pengempu premis (tauke kedai) ke bekaul udah setuju ngambika enda nyendiaka kambut plastik ninting Hari Enam berengkah March 2024 di Saratok.
“Pengawa ngena plastik Hari Enam deka dichaj penyampau 20 sen.
“Kitai deka ngulihka ripot ninting bulan data nguna kambut plastik ke dikumpul seksyen pengerai mensia mayuh Kaunsil Pelilih Saratok Hari Minggu,” ku iya seraya madah naka tu semina lima buah kedai aja udah sedia nyereta kimpin nya.
Antara kedai ke udah setuju nyereta kimpin tu iya nya kedai Family W, Nam Leong, Keluarga, 100 peratus Diskaun Store enggau Tai Chun Mini Market.
Nangkan ke nya ku Joseph, raban Kaunsil Pelilih Saratok mega ngarapka mensia mayuh di Saratok sama nyukung pengawa tu.
Tu dikena nentu pengawa muai plastik di Saratok ulih dikurang seraya ngetankan pemanah rampa menua.-TVS
