SPAOH, 4 Mac: Projek Ngaga Jematan Sungai Paku pemanjai 107 meter enggau buka pemesai 14.42 meter disadang ulih tembu nitihka timpuh ke udah ditetapka.
Sapit Premier Sarawak Datuk Amar Douglas Uggah Embas madahka taja pia iya ngerah raban Opis Kereja Raya (JKR) berunding enggau raban kunteriktor ngambika projek nya ulih tembu tumu.
“JKR udah dipadahka ngambika berunding enggau kunteriktor sekalika sida ulih nembuka projek ngaga jematan tu tumu agi ari timpuh asal laban baka ke dipeda kitai mayuh komponen ke beguna udah tembu.
“Aku chukup tepantup ati,” ku iya pengudah ngabas taba Projek Ngaga Jematan Sungai Paku ditu, kemari.
Nangkan ke nya, Uggah mega ngarapka gaya hari terus manah awakka raban pengereja pengawa ulih ngereja pengawa enggau lanchar.
Diatu status Projek Ngaga Jematan Sungai Paku ke beungkus RM36 juta tembu 15 peratus.
Projek nya berengkah dipejalaika kena 11 Mei 2023 sereta dipelaba tembu kena 10 Ogos 2025.
Sama bisi enggau nyempulang pejalai Uggah iya nya Kaban Parlimen Betong Dr Richard Rapu.-TVS
