SPAOH, 4 Mac: Penembu begunan Makit Komuniti Spaoh mandang penyiru pemansang Perintah Sarawak dikena mantu nyungkak sosioekonomi rayat sereta pedagang mit lebih agi ba pelilih Spaoh.
Kaban parlimen Betong Dr Richard Rapu madahka tu mega asil penyikar Sapit Premier Sarawak Datuk Amar Douglas Uggah Embas ke chukup ransing ngemansangka kandang endur nya.
“Tu siti ari pemansang ke udah dikemujur udah dibai Yang Berhormat Datuk Amar sekumbang beberapa taun ke udah.
“Kitai meda mayuh pemansang ke ulih nukar lanskap sereta perengkaguna rayat di Spaoh.
“Projek begunan tu dikemendarka nengah ungkus RM5 juta ari perintah nengeri.
“Nya alai, kitai meri terima kasih mayuh ngagai perintah laban udah bisi mai penemu ke manah dikena ngemansangka menua pesisir awakka ngembuan perengkaguna ke menyana baka di mengeri,” ku iya.
Dr Richard madah munyi nya maya pengawa Bejadika Makit Komuniti Spaoh, pagi kemari.
Makit Komuniti Spaoh disikap enggau semilan unit palan makai enggau ai irup, 64 lot endur bejual produk pemakai basah enggau asil kebun, kelimpah disediaka agu enggau palan entepan kerita.-TVS
