SARATOK, 2 Mac: Penanyi Rosiana Urai, 52 taun nadai ngasaika status indai tunggal nyadika penanggul endur iya ngasaika pengelantang sebaka enggau orang bukai.
Ku iya, status nya nadai nekul iya lalu iya diatu chukup lantang beridup kediri begulai enggau bala anak sereta bala bakih ke chukup manah.
“Idup kediri pengelama lapan taun tu kebendar bisi maya aku asai deka bisi tawing baka orang bukai tang lebuh berunding baru penyayau ke bala anak sereta diatu sida bela udah besai.
“Nyadi aku chukup gaga enggau idup kediri lalu nyema belaki aku berunding nyau lembau deka nyumai tumu pagi, tumu dani.
“Nya kebuah asai aku lebih bibas idup kediri, deka mindah kini-kini nadai orang nagang lalu aku diatu chukup lantang enggau status nyadi indai tunggal,” ku iya.
Rosiana Urai mansutka pekara nya maya dirandau pengari TVS Saratok pengudah tembu ngerakam lagu baru ke diberi nama ‘Pengerindu Nadai Agi’ ba sebengkah studio di Sibu kena Hari Lima tu tadi.
Ku terang penanyi lama Iban tu ke mega anak ketiga ari enam diri menyadi, kekadang bisi mega iya ngasaika diri deka berumah tangga lalu iya naka diatu ngelempaika pekara nya ba jari petara nyema udah selatan iya betemu enggau orang ke patut iya tetap nerima enggau ati tebuka.
“Naka diatu amat nadai terunding deka ngiga tawing. Orang ke nguji nguntik endang bisi tang netapka ati nya diempu sapa kira empai sedia.
“Taja pia aku enda nulak nyema bisi ‘asap lia’ diberi petara dudi hari, aku tetap nerima nya enggau ati tebuka,” ku iya.
Peranak asal ari Kampung Long Miri Baram tu kala nirika rumah tangga enggau siku pemuzik ari Perlis, Yazid Ismail tang ‘asap lia’ seduai enda panjai begulai semina naka taun 2016 aja.
Sepengudah ke beserara enggau laki iya, Urai mengkang mekuhka pengawa belagu sereta madah diri lantang begulai enggau dua iku anak indu enggau siku anak lelaki iya.
Sekumbang udah mekuhka pengawa belagu kenyau ari taun 1989, Rosiana Urai mujur ngerakam 30 buah album penuh enggau 50 buah album kompilasi dalam jaku Iban enggau Kayan.-TVS
