SPAOH, 2 Mac: Raban Gerempung Ukai Perintah (NGO) ke deka meri bantu tumu besekula ngagai raban nembiak di Betong enggau Spaoh endang dikelalu.
Kaban Parlimen Betong Dr Richard Rapu madah, raban sida seruran tebuka nyema bisi NGO bejalaika pengawa mantu sekula begulai enggau perintah ke pemaik raban nembiak lebih agi sida ke datai ari ruang bilik ke kurang penatai pemisi.
“Ya, program baka tu endang amat manah dikemeranka komuniti baka Program Prihatin Saberkas tu kelimpah ari Saberkas.
“NGO bukai tauka ejensi-ejensi ke deka ngatur program CSR baka tu endang dikelalu iya nya bela nyukung sereta mantu laban agi mayuh orang ba luar dedin ti begunaka bantu,” ku iya.
Iya madah munyi nya pengudah pengawa kelai Nyerahka Bantu Tumu Besekula Saberkas Prihatin Back To School 2024 ngarika Sapit Premier Sarawak Datuk Datuk Amar Douglas Uggah Embas ba Palan Servis Dun Bukit Saban ditu, pagi tadi.
Bisi 70 iku nembiak sekula primari ari tujuh buah sekula primari enggau sekula bansa China di Bukit Saban udah nerima bantu tumu besekula mungkur beg sekula enggau kereban tulis.
Entara sekula ke bisi nerima bantu iya nya Sekolah Primari (SK) Spaoh (5 iku), SJKC Chung Hua Spaoh (5), SK Paku Central (7), SK Penom (10), Sk Saint John (10), SK Suri (10) enggau SK Nanga Gayau (10).
Sama bisi datai ngemataka pengawa tu Sekretari Politik Premier Sarawak Roselnd Mapong Sabai, bala kepala pengajar enggau apai indai nembiak.-TVS
