Kuching, 2 Mac: Sera’o Dalat tauka dikumbai ‘Terendak’ iya nya kereban pesaka komuniti Melanau ti ngembuan potensi besai ulih dikomersialka ngagai komuniti luar.
Siku pedagang Serao Dalat, Fedelis Micheal, 38, madahka, pengawa ngatur Hari Kraf Nasional (HKK) 2024 meri peluang ngagai raban pedagang kraf lokal mantaika penyelai produk asil pengelandik jari ngambika terus dikelala nyentuk ke tikas lebih tinggi.
“ Aku berasai temegah ati ulih mantaika produk ari Dalat iya nya Sera’o Dalat tu.
“ Sambut chukup manah laban mayuh temuai ti datai keterubah iya meda deka nemu enggau silik pasal produk komuniti kami tu,” ku iya rambau ba Pengerami Hari Kraf Nasional 2024 di Kuala Lumpur, ditu, sehari tu tadi.
Berindik ari nya, iya ngarap Sarawak Energy deka terus mantu sepunsa raban pedagang kraf Sarawak ba sebarang program eksibisyen kraf ke bukai pengudah tu ila.
HKK 2024 berengkah 21 Februari nyentuk 4 Mac diatur dikena meri pengaku ngagai orang dagang ti udah mantu ngangkatka pemansang industri kraf menua.
Bisi 640 pedagang kraf ari bidang kraf tekstil, asil kampung, asil tanah enggau bemacham bansa kraf bisi nyereta HKK 2024. -TVS
