KAPIT, 2 Mac: Opis Residen Bagi Menua KapitĀ deka ngatur program lab pemansang di sitak Kunsil Nengeri (DUN) Baleh kena 7 enggau 8 hari bulan March tu .
Kaban Kunsil Nengeri (ADUN) Baleh, Nicholas Kudi madahka, tuju lab nya diatur dikena baum sereta ngelanggur pemansang infrastruktur baka jalai, bekal karan, telekomunikasyen enggau pemansang administrasyen pelilih Bukit Mabong ti tau meri pemaik ngagai perayat di sitak nya.
āSigi besai pengarap aku pasal pemansang komunikasyen ti benung dipejalaika Opis Menteri Utiliti enggau Komunikasyen Sarawak di Kapit ditu nyengkaum di Baleh.
āNaka ke diatu, bisi 44 tiang pemanchar benung didirika ti ditaga tembu dalam ujung taun 2024. Arapka projek tu ulih dirumban,ā ku iya madah rambau ditelefon pengarang berita TVS kena Hari Lima tu tadi.
Kudi madahka, iya ke nyadi pengari rayat di sitak Baleh terus menatika pemansang Projek Mit Menua Pesisir (MRP) enggau Projek Transformasyen Menua Pesisir (RTP) ulih tembu nitihka timpuh ke udah ditaga.
āPenembu projek tu beguna amat dikena ngelantangka pengidup pengani rumah panjai di Baleh ditu,ā tandu iya.
Sebedau tu, iya arapka agih belanja RTP di menua ulu ulih ditambah perintah nengeriĀ dikena mantu ngerumban pemansang ke diguna rayat seraya nganti penembu projek besai ke bisi dipejalaika perintah.
Kudi nerangka, enti dibanding enggau projek besai, projek RTP jarang napi isu laun tembu tauka nyadi projek sakit.
Taja pan projek nya dikumbai projek mit, tang meri reti ke chukup besai dalam pemansang di menua pesisir.- TVS
