KUCHING, 2 Mac: Komiti Besai Pengatur Pengerami Gawai Dayak Renggat Nengeri 2024 udah ditumbuh, ku Datuk Amar Douglas Uggah Embas.
Sapit Premier Sarawak nya madah komiti tu betuaika Menteri Pelajar, Inovasyen enggau Pemansang Bakat Sarawak, Dato Sri Roland Sagah Wee Inn.
“Pengerami Gawai Dayak Renggat Nengeri taun tu deka diatur besai baka taun sebedau tu.
“Kami udah milih Palan Konvensyen Borneo Kuching (BCCK) alai ngatur pengerami tu. Program Makai Lemai Gawai kena 22 June,” ku iya madah pengudah ngatur aum begulai enggau komiti pengatur pengerami nya hari Lima tu tadi.
Antara bala temuai ke dipebasa deka dikangau ngulu pengerami nya ila Tuai Pemegai Menua (TYT) Nengeri Sarawak, Tun Pehin Sri Wan Junaidi Tuanku Jaafar enggau bini iya Toh Puan Fauziah Mohd Sanusi, Premier Sarawak, Datuk Patinggi Tan Sri Abang Johari Tun Openg sereta Menteri Besai Datuk Seri Anwar Ibrahim.
Komuniti Bidayuh nyadi tuai rumah ngatur pengerami Gawai Dayak serak tu, pengudah komuniti Iban taun siti nyin suba sereta komuniti Orang Ulu ba taun 2022.
“Program Bejalai Bebala Mayuh tauka dikumbai ‘Niti Daun’ ti mai raban enggau gerempung ari komuniti Dayak sigi ngemegah.
“Nya alai, aku ngarapka pekara ke sama mega nyadi dalam achara taun tu,” tandu Uggah.
Berebak enggau nya, Sagah madahka kelimpah ari pengerami makai lemai enggau ‘Niti Daun”, achara bukai ke bisi diatur taun tu iya nya Bazar Gawai enggau Karnival Gawai.
“Ari timbal ke diterima bala kami, mensia mayuh ti ngintu Gawai minta bazar nya diatur bulan Mei tu.
“Pemisi Bazar tu ngemudahka sida meli pekayan enggau aksesori tradisional beserimbai enggau musin pengerami,” tandu Sagah. – TVS
