KUALA LUMPUR, 2 Mac: Jaguh angkat berat menua, Bonnie Bunyau Gustin sekali agi ngemegah nama Malaysia ba tikas antarabansa pengudah nyadi champion ba Pekit Powerlifting Para Dunya 2024 di Dubai, Emiriah Arab Bersatu (UAE), Hari Lima.
Champion Paralimpik Tokyo 2020 nya menang midul emas ungkup kategori 72 kilogram (kg) nengah rikod angkat berat pemadu manah iya pemerat 218 kg pengudah ketiga kali nguji.
Ba pengawa nguji keterubah, atlit ti beumur 24 taun asal ari Kampung Mawang Baru, Serian nya mujur ngangkat pemerat 210kg, ditangkan ke 216kg ba pengawa nguji kedua dalam pekit nya.
Pekit ti dipasuk 11 iku penyereta ba pekit besai nya ngemataka atlit ari Great Britain, Mark Swan semina mujur ngangkat berat 213kg enggau Hu Peng (211kg) ari China ti ngujungka seduai bulih midul pirak enggau engkeraju.
Nya midul emas ketiga Bonnie dalam pekit besai nya pengudah menang dalam dua edisyen taun 2021 iya nya di Dubai enggau Bangkok, Thailand.-TVS
