SIBU, 2 Mac: Bisi 31 iku pengani lenyau rumah endur diau pengudah empat buah rumah ke diuan sida angus ba penusah ke nyadi ba Lorong 4 Selatan, Jalai Teku ditu lemai kemari.
Tuai Opis Bomba enggau Penyah Penusah Malaysia (JBPM) Zon 4 Sibu, Penguasa Kanan Bomba (PgKB 1) Andy Alie madah, 22 iku bomba ari BBP Sungai Merah enggau Balai Bantu BBP Sibu Sentral berumban ngesah penusah pengudah nerima kangau tasah urung pukul 2.36 minit lemai.
“Seninjik raban bomba datai ba palan penusah nyadi tepedaka penusah angus ngaul dua buah rumah papan ke udah angus lengis.
“Udah nya, dua buah agi rumah ba sepiak kanan enggau kiba bela udah angus 80 enggau 90 peratus ba kandang endur pemesai 64 kali 316 kaki persegi,” ku iya.
Iya madah, pengawa ngerara api dipejalaika nengah chara ‘offensive’ enggau ‘defensive’ sereta ngena ai ari paip bomba ke semak nya empu nyentuk api mujur padam.
Ku iya, laban rumah ke digaga kelalu dampih enggau pangan diri ngujungka api jampat nyerarai lalu ngaguska empat buah rumah nya.
Bomba ngambi awak 30 minit ngerara api sebedau ke mujur dipadam abis pukul 5.30 lemai.
Penusah nya nadai nabanka sebarang nyawa enggau kebuah penusah nyadi agi dipansik.-TVS
