KUALA LUMPUR, 1 Mac: Sekeda kaban parlimen (MP) enggau senator ari Sarawak udah diberi penerang ari Kepala Luyar Perintah Nengeri Datu Saferi Ali pasal sekeda aspek perambu ubah Konstitusyen Perintah Besai ngaul hak peranak menua ti deka dibantaika ba Parlimen.
Nitihka penerang, aum pasal ubah Akta Pekereja enggau timbal penemu Sarawak senentang akta nya ti bisi ngaul penuduk Ordinan Buruh Sarawak.
Premier Sarawak, Datuk Patinggi Tan Sri Abang Haji Johari Tun Abang Haji Openg kemari bisi datai betemu enggau semua kaban Parlimen enggau Kaban Dewan Negara Gabungan Parti Sarawak (GPS) beserimbai enggau Aum Parlimen Kelima Belas Penggal Ketiga ti benung diatur.
Ba pengawa betemu nya, Abang Johari bisi meri penerang pasal ngeluarka kuasa nengah konsep “cascading” tauka tekat ai anyut ti berengkah dipejalaika di Kapit.
Sama bisi ngulu pengawa nya Sapit Menteri Besai Datuk Seri Fadillah Yusof, Speaker Dewan Negara Datuk Mutang Tagal, Menteri Pemansang Indu, Ruang Bilik enggau Komuniti Datuk Seri Nancy Shukri, Menteri Kereja Raya Datuk Seri Alexander Nanta Linggi, Menteri Penyerakup Menua Datuk Seri Aron Dagang Ago enggau Sekretari Perintah Sarawak Datuk Amar Mohamad Abu Bakar Marzuki sereta bala ke bukai.-TVS
