SARATOK, 1 Mac: Program Ngaul Komuniti Betanam Betupi (Agricorp) 2024 ke deka diatur Opis Betanam Betupi Saratok ba Rumah Kunjan, Bila Dua Kabo ditu kena 14 March tu ila deka digulu pengari ari 34 buah rumah panjai.
Kaban Kunsil Nengeri (ADUN) Krian Friday Belik madahka, entara achara ke deka diatur nyerumba program nya ila baka meri licha bekaul enggau penerang ke pemadu ngagai perayat rumah panjai nya ari ejensi ke bekaul.
“Program tu disadangka deka diatur pengelama sehari penuh iya nya kena 14 haribulan (March) tu ari pagi sampai lemai.
“Nya alai, kitai deka ngangauka (pengani) ari 34 buah rumah panjai urung 200 iku disadang datai maya tu.
“Kitai mega udah netapka sekeda program deka diatur maya nya ila baka meri penerang tauka licha ungkup peranak rumah panjai,” ku iya.
Friday madah munyi nya pengudah tembu Aum Keterubah Pengawa Ngatur Program Agricorp ungkup DUN Krian ba Bilik Aum Opis Betanam Betupi Saratok, kemari.
Pengawa ngatur Program Agricorp Ba Rumah Kunjan Bila Dua Kabo tu keterubah iya diatur.
Program tu kebendar deka diatur taun siti nyin kemari tang ditangguhka ketegal nadai awa.
Entara opis perintah enggau ejensi ke deka nyereta program tu ila iya nya Polis Diraja Malaysia (PDRM), Kaunsil Lada Malaysia (MPB), Opis Bomba Enggau Penyah Penusah Malaysia enggau ke bukai.-TVS
