KUCHING, 1 Mac: Pemujur siku indu Iban ke jelai nama, tampak rita nyadi tebangkar nenun pua ari Kapit, Bangie Embol ti udah mujur nerima Anugerah Tukuh Kraf Menua 2024, empai lama di Kuala Lumpur patut nyadi teladan enggau peransang ngagai nembiak rebak baru.
Serakup Pemansang Krafjari Malaysia nengah portal rasmi madahka, Bangie Embol udah ngaul diri dalam bidang seni tenun pua kurang lebih 40 taun nampung pengawa seni nya ari apai enggau indai iya kenyau ari dara.
Nitihka rikod, Bangie sebedau tu kala ngambi bagi dalam mayuh aktiviti ti diatur ejensi perintah enggau peribit dikena ngangkatka tenun pua ngagai tikas antarabansa.
Berekat ari pengeransing ke ditunjukka iya dalam  bidang seni kraf tenun pua, ba taun 2000, ngujungka Krafjari Malaysia udah nyiri iya nyadi Adiguru Kraf Tenun Pua.
Anugerah nya disuaka Menteri Besai Datuk Seri Anwar Ibrahim nyerumba pengerami Hari Kraf Nasional (HKK) 2024, lalu nya entara pengaku pemadu tinggi diberi Perintah Malaysia nengah pemendar Kabinet Menteri taun 1996.
Sama bisi datai ba pengerami nya empai lama Menteri Dagang Temuai, Seni enggau Main Asal Datuk Seri Tiong King Sing.
Entara motif tenun pua ke suah diasilka iya baka Bungai Rang Jugah, Bungai Buah Sepuyong enggau Bungai Bali Malikut.
Bangie ada kena 8 mei 1945, asal ari Rumah Gare, Sungai Kain Baleh Kapit berengkah nenun pua kenyau ari umur iya 10 taun.
Iya enda besekula, ketegal nadai indai kenyau ari iya ada ti ngujungka iya bisi pengerindu nenun pua lalu ngujungka iya dianjung ke Kuching ngambi kus pengelama tiga bulan.
Sepengudah iya pulai ke Kapit, Bangie mupuk ngajar orang nyulam.
Nitihka cherita ti kala ditusui Bangie, iya mega kala ngajar peranak menua Jipun ke benama Joko nenun pua, lalu bisi mega sekeda peranak ari menua luar diajar iya baka ari menua Bulakan di filipina, Australia sereta perayat ari menua tu empu baka ari Betong enggau Tunoh.
Asil pengelandik jari ti digaga iya chukup manah sereta Bangie bulih bemacham anugerah sereta pemujur dalam bidang kraf baka Anugerah Adiguru ti diatur di menua Iran lalu bulih lumur tiga Anugerah Pua Kumbu.
HKK 2024 berengkah diatur kena  21 Februari nyentuk ke 4 Mac tu tadi dikena meri pengaku ngagai pengawa sereta jasa raban pedagang enggau mega pemekuh kraf ngagai pemansang industri kraf menua. – TVS
