SARATOK, 1 Mac: Raban Nembiak Parti Demokratik Progresif (PDP) Krian kemari bisi ngaga ripot polis bekaul enggau siku orang ke mansutka jaku bejai Premier Sarawak, Datuk Patinggi Tan Sri Abang Johari Tun Openg.
Tuai Nembiak PDP Krian James Jimbun Jimbai madah, penerang ke dibantai siku orang ke ngena nama ‘Bozz Jebat’ tauka Zool Amali Hussin nengah siti video ba laman Facebook apin lama ke udah endang jaku ke enda patut dipansut laba uluh ngeruga pengelantang bansa di menua tu.
“Kami Nembiak PDP Krian ngaga siti ripot polis sehari tu nuju Zool Amali Hussin tauka ngena nama Bozz Jebat ba Facebook.
“Jaku ke udah dibantaika iya nya enda manah ngagai penyerakup bansa di Malaysia.
“Pejah iya nya ba penemu aku endang enda patut nyadi rayat Malaysia ke diuan pupu bansa.
“Jaku ke munyi nya bisi ngundan jaku ajum enggau ulih ngujungka laya antara bansa nyadi ba sebuah menua pupu bansa kitai kebendar idup nelap enggau pangan diri nyadi ari bisi pekara ke baka tu iya deka ngeruga penyerakup,” ku iya.
Iya mansutka penemu nya maya dirandau media ba Balai Polis Saratok pengudah ngaga ripot polis Hari Empat tu tadi.
Sebedau tu, Bozz Jebat nengah siti video ke ayan ba laman Facebook iya mejah pemutus Abang Johari pasal pengawa nyiri Datuk Seri Tiong Nyadi Menteri Dagang Temuai, Seni enggau Budaya.
Penerang nya terang amat ngemaruhka pengulih Abang Johari nyadi tuai pemadu tinggi di nengeri Sarawak.-TVS