SARATOK, 1 Mac: Pemuntan pemekal besai di Kuching nganjung tong gas ngagai pengidar ditemu ngujungka penanggul suntuk bekal Tong Gas Ai Petroleum (LPG) chap Petros di pelilih Saratok.
Kaban Kunsil Negeri (ADUN) Krian Friday Belik madahka, bepelasarka penerang, pengidar sah tong gas di Saratok semina dikemendarka ngidar nitih penyampau ke ditetapka pemekal besai di Kuching ninting bulan.
“Nyadi lemai kemari aku udah telepon lalu berandau enggau orang ke nyadi pemekal tong gas di Saratok.
“Asil randau dia iya nerang kebuah penanggul nyadi iya nya laban pemekal ari Kuching enda ulih nganjung tong mirah (Petros) nya, ukai semina kitai di Saratok aja tang (sama) ba endur bukai,” ku iya.
Iya bejaku munyi nya lebuh nyaut pasal sebana perayat di Saratok tusah bulih tong gas Petros pengudah ngulu sebengkah aum ditu, kemari.
Sebedau tu siku ari perayat nengah laman Facebook iya sebana madah diri tusah deka bulih bekal tong gis Petros.
Berindik ari nya, Friday ngarapka raban ke bekaul baka Opis Menteri Pengawa Dagang Dalam Nengeri Enggau Kos Pengidup (KPDN) bagi menua ulih nurun matau lalu mutarka pekara ke bisi nyadi baka nya.-TVS
