BETONG, 1 Mac: Ejensi pengatur ti bekaul enggau projek Ejensi Pemansang Bagi Menua Betong (BDDA) dipinta lebih chakah dalam bejalaika tanggungpengawa diri.
Chairman Komiti Sektor Pemansang Rama BDDA Datuk Mohd Razi Sitam madahka, saran nya nyengkaum kereja tumu enggau atur nyendiaka skop kereja.
“Kami minta raban ke bekaul, tebal agi JTS ngemuntangka pengawa ‘sitting application’ tu enggau ejensi pengatur ke bukai baka JKR, Kaunsil Pelilih Saratok, Kaunsil Pelilih Betong enggau DID mega ke bisi ngaul, ngambika ulih chakah agi bejalaika pengawa tebal agi ke ngaul pengawa tumu,”ku iya.
Razi ke mega Kaban Kunsil Nengeri (ADUN) Saribas mansutka penemu nya pengudah betuaika Aum Keterubah Pengatur Program AgriCorp Ungkup DUN Krian ba Opis Betanam Betupi Saratok, kemari.
Bisi 42 buah projek BDDA dipatau ba baruh Komiti Pemansang Rama enggau penyampau ungkus semua projek tu iya nya RM377, 929, 800.
Ari penyampau nya, sekeda projek ba baruh komiti nya ngaul pengawa ngaga diwan enggau ke bukai mega udah masuk proses ditinda.-TVS
