KUCHING, 1 Mac: Akademi Serakup Dayak Iban Sarawak (ASADIA) diperansang terus chakah ngintu enggau bedajaka main asal komuniti Iban ba nengeri tu.
Sapit Premier Sarawak, Datuk Amar Douglas Uggah Embas madahka, iya chukup temegah ati meda pemujur program main asal ke udah diatur akademi nya ngelama tu.
Ku iya madah, ASADIA udah numbuhka insiatif ngatur kelas ngajat Iban, kuntau, sape sereta gendang pampat.
“Nya alai, aku ngarapka ASADIA ulih nempa kerejasama enggau Yayasan Main Asal Dayak (DCF),” ku iya madah rambau nerima penemuai meri basa ari raban ASADIA ti diuluka tuai ASADIA Mabong Unggang ba opis iya, Wisma Bapa Malaysia hari Empat tu tadi.
Iya nerangka, DCF bisi endur ke lebih kondusif dikena ngatur aktviti main asal seraya ulih beratika entara peminta guna ari sukut insentif ke lebih manah ngagai bala pengajar sereta jurulatih ti ngaul diri dalam program nya.
Berindik enggau nya, Uggah ke mega chairman DCF madahka, iya udah mantaika perambu ngagai ASADIA ngatur kelas seni nyulam ‘Baju Dabong’ enggau kelas ngaga bungai jarau.
“Pesaka asal Dayak Iban nya nerima peminta ba makit sereta bisi daya dijual sechara komersial,” tandu iya.
Ba pengawa nemuai nya tadi, Uggah bisi ngungkupka geran penyampau RM30,000 ngagai ASADIA dikena nyukung akademi nya ngatur aktiviti sepanjai taun tu.
Tuai ASADIA Mabong Unggang madahka, akademi nya diatu benung ngelanggur deka ngatur kelas ‘Belikan’, ‘Engkurai’, ngaga rengka muzik ‘Tabuh’ sereta ke bukai ti nyadi entara lis projek baru sida.
Iya nerangka, ASADIA deka ngemunka aktiviti enggau program main asal taun tu berengkah ari 11 Mac 2024 tu.
“Mensia mayuh diperansang datai ke Palan Main Asal ASADIA di Kota Sentosa maya hari bulan nya ila berengkah pukul 7.30 malam.
“Sida mega ulih betelefon ngagai aku empu nguna lumur 012-6925562 tauka Victoria (012-2161485) enggau Henry Guya (019-8884370),” terang iya. – TVS
