SARATOK, 28 Feb: Juluk Sarawak ti nambahka rega minimun padi nyadi RM1, 800 setan diterima manah raban orang bumai di nengeri tu.
Ba penemu Mahidi Awang Alli, 64 taun ari Kampung Tengah Perpat berita ke dibantaika Premier Sarawak nya chukup manah lalu meri peluang manah ngagai raban orang bumai baka iya empu ransing agi bumai pengudah ke ngetu kenyau tiga taun ke udah.
“Ba penemu aku peluang tu chukup manah laban ari pemisi bantu (rega minimum) nya reti nya Perintah Sarawak endang chukup siru ngagai raban orang bumai di nengeri.
“Peluang tu enda patut dibasau ngapa lebih agi ngagai raban orang bumai ke udah ngetu bumai baka aku awakka nurun baru ngemansangka umai diri udah tu,” ku iya.
Mashron Morshidi, 61 taun ari Kampung Tengah Perpat bela mansutka penemu ngarapka pengawa nanam padi ba Kampung Tengah Perpat ulih dikereja manah agi udah tu.
“Ari pemisi rega minimum ke udah ditiki ngagai RM1,800 setan tu chukup manah ngagai orang bumai.
“Aku ngarapka bala orang bumai di Kampung Tengah Perpat ulih chakah agi nanam padi udah tu, ku iya.
Nangkan ke nya, ba penemu Saee Ahon, 58 taun ari Kampung Hulu Perpat madah kelimpah ari rega minimum nya raban perintah mega patut meri perati ngagai bantu bukai baka ngemanah jalai raya nuju umai awak ke ngemuntang sida ngangkut padi enggau ngereja pengawa ke bekaul.
“Perambu Perintah Sarawak ti deka nikika rega minimum padi ngagai RM1,800 endang manah lalu aku endang setuju amat.
“Tu dipeda ulih meransang raban orang bumai ngemansangka umai besai agi dudi hari.
“Kelimpah ari nya, perengkaguna infrastruktur bukai baka jalai raya nuju ke umai patut diperundingka perintah awakka bala orang bumai senang ngangkut padi sida.
“Pia mega perintah patut berundingka bantu bekaul baka rachun indu utai enggau ke bukai,” ku iya.
Sida bela mansutka penemu diri maya dirandau bekaul enggau juluk Perintah Satawak ti netapka rega minimun berau RM1,800 setan metrik sehari tu tadi.
Sebedau tu rambau Program Jalinan Kasih Tani Beranyi Begulai Enggau Premier Sarawak di Diwan Kampung Lubok Punggor Gedong empa lama, Premier Sarawak Datuk Patinggi Tan Sri Abang Johari Tun Openg bisi madah Perintah Sarawak deka netapka rega minimum padi ngagai RM 1, 800 setan metrik.
Penyampau nya pengudah ditambah RM500 ari RM1,300 ke udah dipadahka Menteri Betanam Betupi enggau Jamin Pemakai (KPKM) Datuk Seri Mohamad Sabu maya nemuai ke Sri Aman, Sarawak sebedau tu.-TVS
