SERIAN, 25 Feb: Pemujur Tuai Raban Bansa enggau Tuai Rumah di Bagi Menua Serian numbuhka Gerempung Tuai Raban Bansa enggau Tuai Rumah Iban Bagi Menua Serian nyata mandangka pengeransing sida bejalaika pengawa ke udah diberi.
Sapit Premier Sarawak Datuk Amar Douglas Uggah Embas madah nengah pemisi gerempung nya genap penanggul rayat sereta strategi pemansang ba sitak diri deka ulih teputar enggau manah.
“Tu nunjuk ke bala kita bisi runding, penemu chara kuing tuju deka ngatur pengawa ti udah dilempaika perintah.
“Nengah pemisi KMKK di Serian ditu tentu iya deka ngemuntangka kita berandau sereta nyadi penyambung ke manah ngagai perintah GPS.
“Beri tabi puji ngagai semua kita laban udah mujur numbuhka gerempung tu,” ku iya.
Uggah madah munyi nya maya bejaku ba Pengerami Serumpu Makai Lemai diatur ba Diwan Masyarakat Serian, malam tadi.
Ku tandu iya, KMKK bejalaika pangku pengawa ngempung rayat ba renggat baruh enggau mesti nentuka semua program pemansang ke udah dilanggur peritah ulih dikemujur ke pemaik rayat.-TVS
