SARIKEI, 25 Feb: Palan Servis Sitak Kunsil Nengeri (DUN) Kuala Rajang diatu udah bisi nyendiak servis Raban Perubat Mindah Kin Kitu (MMT) ti nyendiaka servis perubat sechara pechuma ngagai komuniti lokal.
Kaban Kunsil Nengeri (ADUN) Kuala Rajang, Datuk Len Talif Salleh madahka, servis ke diberi nya nyengkaum pengawa berubat tumu sebedau pesakit diasuh beperesa ba klinik tauka sepital.
“Kami meri servis perubat ke enda berat sebedau sida diasuh beperesa ke klinik tauka sepital.
“Beduduk enggau nya, aku meri terima kasih ngagai Raban Perubat Mindah Kin Kitu laban mayuh ari sida nya udah kala gawa ba Opis Menteri Pengerai suba tauka sida ke udah pinchin.
“Naka diatu, semua sida tu ransing amat bejalaika pengawa,” ku iya.
Iya ke mega Sapit Menteri Perambu Mengeri, Pengatur Tanah Enggau Rampa Menua Sarawak mansutka jaku nya rambau ditelefon pengarang berita TVS lebuh Hari Enam.
Empai lama, MMT udah ngayanka komitmen ke chukup badas dalam mantu ngatur program betutus perdana ti diatur ba Diwan Kampung Seberang Sarikei.
Program nya dipasuk lebih 200 iku nembiak di Sarikei enggau Tanjung Manis ke nyadi sebagi ari aktiviti servis komuniti dikena ngelempungka tating belanja apai indai ti kurang penatai pemisi.-TVS
