SERIAN, 25 Feb: Bala Tuai Komuniti enggau Tuai Raban Bansa (KMKK) di selampur nengeri tu mesti seruran ngadang diri beratika pekara ti nyadi ngelingi sida, ketebal agi ba rumah panjai.
Sapit Premier Sarawak Datuk Amar Douglas Uggah Embas madah, chara baka nya ngemudahka sida bejalaika pengawa meri penerang ngagai rayat pasal pemansang ti dibai perintah ngambika ditemu ba semua renggat.
“Aku arapka kita enda tau enda nemu gaya data-data bala (nembiak redak) ba rumah panjai ke dipegai diri.
“Ari pemisi data nya nyadi kita ulih bejalaika tanggungpengawa nyukung GPS nyukung atur enggau pengawa ngemansangka rumah panjai kitai.
“Nya alai aku ngarapka data nya patut diadu enggau manah,” ku iya.
Iya mansutka jaku nya rambau bejadika Program Serumpu Makai Lemai diatur Gerempung Tuai Komuniti enggau Tuai Rumah Iban Bagi Menua Serian malam tadi.
Lebuh bejaku dalam program nya, Uggah ngelalau KMKK mesti meretika semua penerang bekaul enggau program pemansang ti udah enggau deka dipejalaika perintah ungkup pemaik rayat.
Tandu iya, penerang ke diterima nya mega mesti dipadah ngagai rayat ba genturung pendiau sida awakka semua orang nerima input ke patut pasal pemansang ti udah dilanggur Perintah Sarawak.
Ba pengerami nya, Uggah bisi nyuaka chek RM30,000 ungkup Gerempung Tuai Raban Bansa enggau Tuai Rumah Iban Bagi Menua Serian dikena ngatur aktiviti bekaul enggau tiga set GPS dikena sida nyukat tanah NCR diri.
Sama bisi meri belanja ngagai Gerempung Tuai Raban Bansa enggau Tuai Rumah Iban Bagi Menua Serian iya nya Kaban Kunsil Nengeri (ADUN) Balai Ringin Datuk Snowdan Lawan meri RM20, 000 lalu ADUN Tarat Dato Sri Roland Sagah Wee Inn enggau ADUN Kedup Datuk Martin Ben bela meri RM10,000.-TVS
